manlove

Sunday, July 01, 2007

點解呀???做乜事呀???

愈睇愈嬲,本來要寫篇感性碟(歌)評,都寫唔出。要寫左呢篇先囉。


點解係唔係都要十年呀?好悶喇,夠喇!點解十年前的我,一定是面對各種不同的人與事,十年了,我終於認清了更清楚的自己,對人對事對世情都多了很多體會,一切重新出發了.....唔係呀,要認清自己,我其實一年就認到架喇,十年時間唔係咁大變化架咋,我呢十年其實都唔知自己做過乜呀!

點解“香港女皇”變左係汪明荃呀?唔係呀,汪明荃做戲好差呀,野蠻奶奶唔知佢想點呀,做主持成日望錯鏡頭,試過講錯左東華熱線電話號碼,係成個臨把錯晒呀,唔好再講洛琳喇,30年前架喇!

點解忽周又作野呀?官恩娜個親熱男唔會係呢個人呀,唔好作得就作啦,我10年前(真係10年喇)晚晚係Why Not見到佢架......忽周唔該去人地個blog睇下啦,人地將個記者既作野實錄對白,全部寫晒出黎喇!蘋果既"紅BLOG BLOG"仲唔快d報導出黎?肥佬睇唔睇到呀又?

點解有咁多"紅BLOG BLOG"同"CLICK CLICK情報科"呀?唔想再睇網料呀!係咪全港都無人上到網,得蘋果大樓既電腦先上到網呀?唔係呀,我日日係屋企上網都睇晒討論區喇!唔好再用外娛同各電影票房報告做C1得唔得呀?我知架喇呢d都!

點解鄺美雲都做到封面呀?我唔信,我唔想睇呀,一張相都無架。鄺美雲唔係同郭台銘一齊呀,收料話係喎,好堅喎!我都收到呀,鄺美雲其實係同Cash Kwong一齊先係呀,Cash一直都係人扮架,快去偷影佢喇,Cash識講野,有電話,問埋佢回應都得,Cash真係會答你架!堅架!  做乜事呀?唔想睇呀,我要睇三周呀,仲要買三本支持呀,因為人地真係影到大美人同亨亨係意大利呀,唔係美國呀!

點解係陳日君上街與你風雨同路呀?唔係呀,我都想普選,我都愛民主呀,但係我唔想聽陳日君講野呀,如果要做A1,點解主教又真係一句野都無講過架?唔好回歸,唔好慶祝,唔好放煙花得唔得呀?好塞車呀,星期一仲要九點返工架!

點解呀?好多點解呀,有無人答到我呀???

1 Comments:

At 11:46 PM, Blogger Unknown said...

Hi there:
i found a lots of common interest between you and me, are you interested being friends? =)
my msn is :cheunglikis@hotmail.com

lik

 

Post a Comment

<< Home