點解呀？？？做乜事呀？？？

愈睇愈嬲，本來要寫篇感性碟(歌)評，都寫唔出。要寫左呢篇先囉。


點解係唔係都要十年呀？好悶喇，夠喇！點解十年前的我，一定是面對各種不同的人與事，十年了，我終於認清了更清楚的自己，對人對事對世情都多了很多體會，一切重新出發了．．．．．唔係呀，要認清自己，我其實一年就認到架喇，十年時間唔係咁大變化架咋，我呢十年其實都唔知自己做過乜呀！

點解“香港女皇”變左係汪明荃呀？唔係呀，汪明荃做戲好差呀，野蠻奶奶唔知佢想點呀，做主持成日望錯鏡頭，試過講錯左東華熱線電話號碼，係成個臨把錯晒呀，唔好再講洛琳喇，３０年前架喇！

點解忽周又作野呀？官恩娜個親熱男唔會係呢個人呀，唔好作得就作啦，我１０年前（真係１０年喇）晚晚係Why Not見到佢架......忽周唔該去人地個blog睇下啦，人地將個記者既作野實錄對白，全部寫晒出黎喇！蘋果既"紅BLOG BLOG"仲唔快d報導出黎？肥佬睇唔睇到呀又？

點解有咁多"紅BLOG BLOG"同"CLICK CLICK情報科"呀？唔想再睇網料呀！係咪全港都無人上到網，得蘋果大樓既電腦先上到網呀？唔係呀，我日日係屋企上網都睇晒討論區喇！唔好再用外娛同各電影票房報告做C1得唔得呀？我知架喇呢d都！

點解鄺美雲都做到封面呀？我唔信，我唔想睇呀，一張相都無架。鄺美雲唔係同郭台銘一齊呀，收料話係喎，好堅喎！我都收到呀，鄺美雲其實係同Cash Kwong一齊先係呀，Cash一直都係人扮架，快去偷影佢喇，Cash識講野，有電話，問埋佢回應都得，Cash真係會答你架！堅架！　　做乜事呀？唔想睇呀，我要睇三周呀，仲要買三本支持呀，因為人地真係影到大美人同亨亨係意大利呀，唔係美國呀！

點解係陳日君上街與你風雨同路呀？唔係呀，我都想普選，我都愛民主呀，但係我唔想聽陳日君講野呀，如果要做A1，點解主教又真係一句野都無講過架？唔好回歸，唔好慶祝，唔好放煙花得唔得呀？好塞車呀，星期一仲要九點返工架！

點解呀？好多點解呀，有無人答到我呀？？？

黑眼圈

每隔一年，總在電影節看一看蔡明亮。《天邊一朵雲》後是《黑眼圈》，事到如今要看蔡明亮的電影，可能都是一種習慣成自然，在我眼中最好的蔡明亮是屬於過去的，我依然很懷念蔡明亮在《青少年哪叱》和《愛情萬歲》那種簡單，很城市的感覺，小康有真正的生活，有朋友，有家人，有感情有煩惱；近年的蔡明亮於我來說，未免太未世太荒涼了，一切都要大，視野要大，畫面要大，訊息要大。

當然明白蔡明亮不能走回頭路的想法，有戲開已算執到了，你睇楊德昌!

愛蔡明亮，當然還有李康生。一拍十多年，李康生由青年變中男，想當年我有機會訪問李康生，攝影師竟然提議要他全裸上陣，因為他拍親戲都要裸，兼覺得他像極張國榮．．．我對這個提議當然非常贊成，只是亦想像得到被李康生反對啦，後來輯相點影，我也忘了，反正篇訪問因為太無野講而無出到街呢!!

《黑眼圈》，我最愛個英文戲名《I Don't Want to Sleep Alone》。


P.S.又係想當年，我慶幸我愛的都讓我訪問了，李康生，蔡明亮，陳珊妮，楊乃文，黃碧雲，楊德昌，陳綺貞．．．如今想來，真係講玩咩?當年銷量最高的娛樂雜誌喎?真係要多謝公司的包容咯，而家受既報應，都抵囉!

恨台上卿卿或台下我我 不是我跟你

音樂圈的才子佳人，好似台灣比香港多，真正開花結果的，先例亦比香港多。通常都是男主內，女主外，男既背後默默發功，女既在台前發光再發熱，分工清楚，是那麼相濡以沫。

去年的台灣金曲獎，一直做陳綺貞背後的男人的鐘成虎，得了《華麗的冒險》最佳製作人，為自己心愛的人做碟，還要得埋獎，是雙重的bonus。更令人感動的是，陳綺貞的反應，只一直掩著臉，沒有多餘的造作，看得人窩心又感動。須知道換轉是香港的金童玉女門，這會是個C1的大龍鳳，就像那個甚麼「廚房宣言」!

陳綺貞與鐘成虎，一直並肩作戰，有金曲獎的肯定，是個圓滿的結果。我看著這段片，不其然相起林憶蓮與許願，只是許願的質地與鐘成虎爭得遠，陳綺貞的道行又要比林憶蓮低得多，所以，所以，那一刻台上台下的交流感動，只可能發生在陳和鐘身上，才覺真心的。幾近完美。

菲十年

89年。99年。

原來過多2年，王菲小姐就入行20年喇。時光菲逝，快過打針。

十年一夢。王靖雯89年參加「亞太金箏流行曲創作大賽」，以《仍是舊句子》參賽，她的長年伯樂梁榮駿作曲，填詞係名叫綠葉的小姐(唔知係咪即係《明周》既黃阿媽呢?），長直娘髮，滿口鄉音，不過都聽得出係唱得之人喎；用返真名王菲，99年做《唱遊王菲》演唱會，簡直變左另一個人，我認為是王菲最精彩的演唱會，踩住水獨家菲吟《臉》個一part,都已經值回票價，還有同竇唯可一不可再的同台合作．．．短短十年間，真係一個天后的誕生。神奇過任何神仙水。




我一廂情願地認為，除了王菲去了美國學聲樂那幾個月，佢既音樂養份同修為，唔多唔少都係由竇唯帶比佢既，當然王小姐既造化，更加青出於藍啦!

最近的王菲，聞說在北京小打了很多四方城，反而日日連瑜珈靜心淨身。要她再踏台板，可能郭台銘先請得郁喎!

煙花多 仔仔更多

年初五。澳門。阿飛。仔仔。撞手。222。紀念日。煙花。寂寞。

喜歡你過去的樣子

提起黃韻玲,除左真係唔知佢幾時會再出碟外,剩低的最大感覺都全屬回憶之內。

為了她,我翻讀<<聽見2000分之100>>,回味再回味的都是陳珊妮的文章,佢寫黃韻玲的<<憂傷男孩>>,「其實不是那種非買不可.....事實上我很小會想起它......但<<憂傷男孩>>註定要出現在陳珊妮16歲生命中的專輯....」,「很高興和黃韻玲分享過真正的年輕。」


我無陳珊妮咁言重,不過黃韻玲的聲音和回憶,我久不久就想起,那個聽收音機的年代,陳海琪好多個夜晚,都會播<關不掉的收音機>和<3個人的晚餐>,無錢買碟,就靠聽收音機,的確好多歌我都是聽海琪而來的。她有一次試過將Sade的Smooth Operator同<3個人的晚餐>接住播，對於當時一個中一，二的我來說，嘩，已經覺得天外有天喇；我又記得她那時還常播一隊叫印象合唱團的歌曲。我現在有機會和海琪傾起,同佢講「你成日播乜乜乜架...」,佢就話「係咩？有咩？真係唔記得咯!!!」我既結論係,有好多時你記到死,覺得刻骨銘心既,人家早已忘得1乾2淨,都算諷刺!


要計到正,應該94年<<黃韻玲的黃韻玲>>之後,都無出過新碟咯，「友善的狗」都是上世紀的回憶．．．如果要講音樂圈的天生一對，咁黃韻玲同沈光遠都走唔甩。黃韻玲寫過<你是唯一>比佢老公，９６年大住肚影唱片封面，出左張１０年作品集。仲有佢大住肚去林憶蓮台灣演唱會上台獻花，舊年拖住個１０歲仔仔，歷史重演林憶蓮０６台灣演唱會，真係touching!!


新碟未有得出，只有在小小的獨立合輯中出現，０４年在543音樂站合輯中有好動人既《Arthur》，應該是她仔仔的名字。

女人最大的事業，原來都係一個家。

我的80年代

都記不起是由那時聽雷光夏,當年如果知道有人去台灣,總會叫他們幫我買黃韻玲既舊碟,雷光夏既碟,仲有<<誠品好讀>>......都好耐無呢支歌仔唱咯. 舊年同阿志去台灣,發現好多音樂雜誌,要錢的,派的,都好似少左好多選擇囉!!!

發現雷光夏新碟,又關阿麥事.原先係去買回所有蘇打綠既single,跟手就發現雷光夏新碟<黑暗之光>!

點題作<我的80年代>正到爆,超好mood! 應該唔關何韻詩<你是80年代>事囉!!

實在好難想像,一個似足教書miss樣既人,可以係電音又得,民謠又得女聲,而雷光夏多年來都咁低調,只做自己愛既音樂,佢都係一個烈女黎架.似教書miss既烈女,真夠精神分裂啊!!


睇台灣網友既blog,話睇<我的80年代>MV,一路睇一路喊喎,我無佢咁激,不過都差唔多囉!!

諗諗下,唔知黃韻玲幾時出碟呢? 又要等囉 !!

烈女圖

當G奶不厭其煩地抄厘抄路,梁靜茹又肯定不是我杯茶,張惠妹只能回憶,孫燕姿靜過鬼,S.H.E更加唔好提....台灣天后官仲有幾多值得等,值得聽?

商業大路的不說,連陳綺貞都只樂於沉醉自家手作仔,你急佢唔急既地步,另一個陳,珊妮,只掛住拜金事業,仲有乜好講呢?

這篇遲來的碟評,好在仲有楊乃文同雷光夏.

我有興趣既係,楊乃文既愛情故事,佢同林暐哲散左,事業愛情都無埋,本來才子配烈女,無林就無楊,無左男人,睇過報導話楊乃文都好似有段抑鬱期....
01年出過<應該>之後就無左影,加上滾石(魔岩文化)生意難撈,楊乃文幾乎人間蒸發.


5年先出山,好在有邱黎寬(寬姐)執佢返黎,簽左佢.重新出發,做了一張精彩的回歸作<<女爵>> ,亦合晒我心意,點題作係蘇打綠主音青峰作曲作詞的<女爵>.好好FEEL喎,可能青峰都想做呢! 呵呵!!!

都2007年了,烈女都是上世紀的事.記得楊乃文頭一次來港宣傳,98年,我訪問過佢,仲係幫阿米巴做秘撈添....烈女有格,抽要抽紅萬(那刻我想起我崇拜的伊慧能，伊當年在壹周刊辦公室，也是抽紅萬的)，「薄荷不好抽,像吃風一樣」 楊乃文說. 烈是烈,但我仍記得她人很有禮貌,令我更覺她的所謂烈，更加不是扮出來的!!! 唔係要咀藐藐懶cool先叫烈,楊乃文同伊慧能都是我心目中真正有修養的烈女啊!

P.S. 其實寬姐都係烈女喎,每個記者都說次次見親佢,都係聽佢爆緊粗既,不過義氣仔女,就係鐘意幫呢個救個0個,傳聞話好多無工開既人都會搵寬姐,不是傳聞既係,佢養埋陳寶蓮個仔喇!! 仲有你又點諗到,平時粗口爛舌,又可以幫王菲寫出<推翻>同<空城>呢又?!

來一杯蘇打綠

好似好耐未試過咁迷一樣野.

通常都是無心的發現之下,然後先至不斷搵呀搵呀搵,起佢底,跟住就迷左落去,同愛情差唔多囉!!!!

因為一個綠色single既封面,舊年10月(呢次後知候覺左添)0係阿麥度買左,跟住都無乜機會聽,一聽就愛上左,<空氣中的視覺與幻覺>2個版本,都有種奇妙感覺,每晚都聽過先安樂.


台灣的蘇打綠,我之後發現左更多......主音既青峰,佢0個把超高音既聲,其實可以好作狀同難頂,但偏偏就有法子令你忍唔住聽落去. 0係youtube既發現係,佢專扮女人聲,試過0係騷度現場唱王菲<開到荼糜>(仲要拎埋大聲公) ,唱過<棋子>,0係K場同朋友慶祝生日,佢唱左陳綺貞首<雨天的尾巴>改為<生日的尾巴>,同樣有晒造手喎..........

如果,如過換轉係香港的假音人,我會好反感囉 !!! 但係聽見穌打綠咁樣唱歌,唔知點解一D反感都無喎.......加上各成員都係政大高才生,吉他手家凱仲係政大泳隊既大紅人,又加左分咯.

最衰係舊年WILD DAY OUT錯過左佢地來港既演出,唔知幾時先有機會呢?? 青峰唱LIVE真係好得喎!!

鄭秀文與黎堅惠

两個冇乜關連嘅人。
不過甘啱得甘橋，我睇完《飲食男女》黎堅惠專欄，就睇《明周》鄭秀文嘅「繪本」。一天一地，两个世界。
先說黎堅惠。
近年黎堅惠的文字，愈來愈可親，只求傳真，不扮高深，最深得我心！雖然仍偶有出現「筆者十三年前已着×××××，今年新興的這款，筆者三年前已在日本／巴黎買了」．．．之類之類的說話，不過仍可接受。
她今期在《飲食》寫Martin Margiela ,就好到point,睇得我好開心。不扮嘢，平易近人的文字，卻有刺激人想法的魔力，是一種修為。我都係揸筆揾食（雖然愈來愈少寫），我開始諗，石琪同舒琪（寫影評嗰個），我想做石琪（雖然我唔寫影評，哈！）
再講鄭秀文。
她期期在《明周》畫畫，寫吓字，化名ah Mi ,欄名叫《輕描淡寫》，其實大可改為《無定向風》（楊懷康？哈！），期期睇，我都驚訝《明周》編輯部對她的寬容，美其名叫自由度囉！
今期她寫「意識流....」,嘩,作狀都不能!!!!!!
這種斬件跳躍式生活日誌寫法〈即上文不接下理〉,是那種好想寫嘢,過吓作家癮的人,最易的入門不二之法,初班都不得了!!!
鄭天后提及什麼佛洛伊德,杜斯妥也夫斯基,鍾錢書.....真係天花亂墮一番!!
家家有求。鄭秀文今時今日最想投射出來的角色，大概如此！
情願相信ah Mi立地成佛，在家讀多幾次《罪與罰》，看多幾回《Iris》，與以往那個掟飯盒，摑助手的浪黎(或者叫臭x)女人一刀两斷，也是一種修為。
係先好！


P.S. 今期《明周》最好睇係王志強寫李宗盛篇「我不難過」，攪到我都手痕添！！

我睇你唔到 我睇你唔到

我信「雖無過錯,但面目可憎」這回事。其實我自己可能都係呢類人! 哈
不過我真係好唔好彩,最唔想見既,都要撞個正着。
唔係第一次喇。可能我真係同佢有緣─孽嗰隻,次次事發地點都喺天后,佢大概好想自己係天后,可惜佢係王Ｘ,不是王菲。
之前大坑撞過,７記撞過,甜咀兒撞過,前日喺德昌都要見到佢!!!!
吾知點解,呢位冇碟出的王×小姐,是否知道我的職業(其實之前音樂会之類的場合是同場的,但需知道她Ｎ年冇出席過類似場合啦!!)我小人之心直覺認為她好想我会影她呢,但實情係我不会影相的!!!
friday night 喺德昌見到佢已掃興啦,佢同个肥男一齊,係個你up吾到全名既類似DJ物體,我眼尾睄到王小姐動作開始誇,声音開始大,扯煙舉止愈益豪放,手上的紋身(不)自覺地hold住.......
救命!!!我即用手上本"牛奶"擋哂成个畫面。
明星總想俾人影俾人望，不論大或細，吾理紅定奀！唉！
「算啦！佢都冇得罪你！」卡文話。
係，不過就係「雖無過錯,但面目可憎」囉！！
我會叫啲手足，辣更時禁影王×囉。其實影左都吾会出，冇謂嘥咭位！！
佢以為自己真係王菲咩！
求神拜佛，吾好再喺天后見到佢，其他地方都吾想囉！！

P.S.德昌既營養餐加沙爹牛公仔麵係我至愛，不過嗰日冇哂胃口咯。

尋找陳刀

我好耐冇見陳刀咯，佢６６６回歸CWB之後，我上個禮拜六先去搵佢，仲有阿joe,同孖仔,我０係樓下等佢地嗰陣，仲撞到阿荼添！咪話吾邪！
傾左成晚計，溝左個我吾知セ名既紅酒雜果特飲，吾覺吾覺都飲左好多杯，high high地,吾使去PP隊long island囉!
圍埋冇野做,竟然講鬼故,變左中学生宿營....事後同陳刀都一致認為:「其實一早應該提議麻雀王啦！」原來孖仔都手痕架！
邪刀回歸，大家多多捀場啦！行經老銅不防上去襯吓囉！都喺諾克道，吉野家對面，colour私竇樓上,吾買都睇下丫。

P.S.呢排陪住我晚上上網嘅音樂伴侶,係陳小霞嘅<暗舞>同陳綺貞嘅<小步舞曲>,两首不停放。两位都姓陳，两隻都有舞，真橋！尤其＜小步舞曲＞好似從末離開過我甘，原來陳綺貞真係百聽不厭架。

尋找周杰倫

他們都叫他做周杰倫,放假日子忽然金生一個電話:「今晚周杰倫黎左,你出吾出黎食飯！」
呢個周杰倫,不是來自台灣,是來自上海的,上去做野,無佢吾掂。話個樣好似喎.....我晨早見過相,不過未見過真身。無野做,又想去食謙記,緊係去啦!
點知竟然改左地點,謙記冇得食,去左間我永遠唔會記得個名,落地牢0個間打邊爐囉.....
一去度,嚇左一跳,變左家庭樂,金生同阿忠,老婆同女黎晒,合家歡都冇甘熱閙。終於見到主角,講真帥過真正周杰倫好多咼,哈...食都食得開心啲囉!!
臨走剛做新郎哥嘅比利仔都黎埋,我要埋稿,搞到之前一晚去吾到飲,見吾到好多人,又冇得乘機大醉一番,真吾坻!!呢份工令我損失真多!!
最後都係同比利仔隊左一杯百威甘大把....之後佢地成村人帶左周杰倫去老蘭見識下咼!!
我吾知點解冇乜mood去，自己返歸。東尼仔話：「去PP囉！」哈：「星期二邊會有人呀！」我話。
我諗如果周杰倫去PP，應該收視率好高囉．．．呵呵！！
P.S.究竟誰是周杰倫?應該好易估咼。